Në datë 24 janar 2026, protesta e thirrur nga Partia Demokratike para Kryeministrisë në Tiranë u tensionua menjëherë pas përfundimit të fjalimit të kreut të saj, Sali Berishës.
Protestuesit hodhën dhjetëra koktejle molotovë dhe fishekzjarrë (kapsolla) drejt godinës, duke shkaktuar shpërthime në flakë përballë saj. Tensionet rrezikuan forcat e policisë në kordonin mbrojtës dhe vetë protestuesit, ku njëri prej tyre u përfshi nga flakët për disa momente.
Forcat e Policisë së Shtetit ndërhynë për të shuar zjarrin dhe u përgjigjën me spraj gaz lotsjellës dhe ujë nga autoboti për të larguar turmën. Protestuesit hoqën një pjesë të gardhit rrethues pranë godinës qeveritare dhe vendosën foto të anëtarëve të kabinetit qeveritar, çka çoi në përplasje fizike me policinë.
Pas këtyre tensioneve, protestuesit u tërhoqën nga Kryeministria dhe marshuan nëpër bulevard drejt Ministrisë së Infrastrukturës dhe Energjisë, Bashkisë së Tiranës, Kuvendit dhe përfunduan në selinë e Partisë Demokratike. Gjatë kësaj, Sali Berisha valëviti flamurin shqiptar nga podiumi.
Përditësime
Policia e Shtetit konfirmoi arrestimin e 20 protestuesve pas tensioneve në protestën e PD-së.
- 11 punonjës policie u lënduan dhe po marrin ndihmë mjekësore.
- Përplasje fizike pranë Kuvendit përfshinin deputetët Flamur Noka, Luciano Boçi dhe Besart Xhaferri.
- Flamur Noka u bëri thirrje policisë: "Mos prekni qytetarët".
- Sali Berisha deklaroi: "Sot jemi në kilometrin e fundit drejt fitores".
- Disa gazetarë u lënduan gjatë përplasjeve.
- Zona para Kryeministrisë u rrethua si "skenë krimi".