Një incident ka shënuar protestën qytetare të organizuar para Kryeministrisë në Tiranë, ku është denoncuar prania e individëve që po kërkonin të dhëna personale. Sipas njoftimeve të dhëna nga podiumi, persona të paidentifikuar po mblidhnin karta identiteti dhe firma për një peticion, nismë kjo e cilësuar nga organizatorët si e paligjshme dhe e paautorizuar.
Pas denoncimit publik, në turmë u krijuan momente tensioni. Në video-pamjet dhe dëshmitë e publikuara, janë evidentuar disa të rinj të veshur me kapuçë dhe syze të mëdha, të cilët ndodheshin mes protestuesve. Veçanërisht, një burrë është parë duke iu kërkuar qytetarëve dokumentet e tyre të identifikimit për të firmosur peticionin e supozuar.
Organizatorët u bënë thirrje qytetarëve të tregohen të kujdesshëm dhe të mos dorëzojnë dokumentet e tyre personale te persona të paautorizuar. Qëllimi i vërtetë i mbledhjes së këtyre të dhënave dhe organizatori i kësaj nisme mbeten ende të pasqaruara, ndërsa pjesëmarrësit në protestë kanë kërkuar sqarime mbi identitetin e personave të përfshirë në këtë veprimtari.