Në një atmosferë tensioni para ndërtesës së Kuvendit, deputetja e Partisë Socialiste, Elisa Spiropali, deklaroi se fokusi i forcave politike duhet të jetë puna për qytetarët. Në një prononcim për mediat, përpara fillimit të seancës plenare, ajo theksoi nevojën për reflektim të brendshëm të çdo force politike.
Sipas Spiropalit, debatet politike nuk duhet të zhvendosin vëmendjen nga përgjegjësitë e Kuvendit. "Nuk duhet të merremi me protestuesit, por me veten. Kuvendi duhet të përdoret për të folur për njerëzit, për shqetësimet e tyre dhe për të ofruar zgjidhje konkrete", deklaroi ajo. Ajo shtoi se secili kah politik duhet të bëjë analizën e vetes përpara se të fokusohet te kundërshtari.
Kjo protestë pason tubimet që po zhvillohen prej 32 ditësh përgjatë bulevardit "Dëshmorët e Kombit". Pjesëmarrësit kundërshtojnë planin për investime në Zvërnec dhe kërkojnë largimin e kryeministrit Edi Rama. Situata para institucionit ligjvënës është shoqëruar me tensione midis protestuesve dhe forcave të rendit.