Përpara fillimit të samitit të G7 në Francë, marrëdhëniet tregtare midis Shteteve të Bashkuara dhe Francës janë tensionuar sërish. Presidenti amerikan Donald Trump ka paralajmëruar vendosjen e tarifave ndëshkuese prej 100% mbi importet e verës dhe shampanjës franceze, si kundërpërgjigje ndaj taksës digjitale që Franca aplikon ndaj gjigantëve të teknologjisë me bazë në SHBA.
Sipas Trump, kjo masë tatimore franceze godet në mënyrë disproporcionale bizneset amerikane në sektorët e shërbimeve online, reklamimit dhe tregtisë elektronike. Ai deklaroi se i ka kërkuar Emmanuel Macron që të shfuqizojë taksën në fjalë, duke paralajmëruar se në të kundërt nuk do të ketë zgjidhje tjetër përveç aplikimit të tarifave të larta.
Nga ana tjetër, Presidenti francez Emmanuel Macron e ka kundërshtuar këtë qëndrim, duke e cilësuar si të papranueshme ndërhyrjen e Uashingtonit në legjislacionin evropian. Në një intervistë për TF1, Macron deklaroi se taksa digjitale është pjesë e legjislacionit në fuqi dhe theksoi nevojën për stabilitet ekonomik.
“Nuk është detyrë e Shteteve të Bashkuara të vendosin se cili duhet të jetë legjislacioni i evropianëve apo i francezëve”, u shpreh Macron. Ai kujtoi se situata të ngjashme janë shënuar edhe në të kaluarën, siç ishte rasti i samitit të Biarritz në vitin 2019. Presidenti francez bëri të ditur se do të zhvillojë një bisedë “të respektueshme, por të vendosur” me homologun e tij amerikan, me synimin për të demonstruar se detyrimet tregtare nuk janë të dobishme për asnjë nga palët anëtare të G7.