Një lëkundje e fortë sizmike me magnitudë 7.4 të shkallës Rihter është regjistruar të premten, më 17 korrik 2026, pranë Puerto Madero në shtetin meksikan të Chiapas. Sipas Shërbimit Gjeologjik të Shteteve të Bashkuara (USGS), epiqendra është lokalizuar në zonën detare, 71 kilometra në jugperëndim të këtij qyteti, ndërsa thellësia fokale e tërmetit ishte 10 kilometra.
Lëkundjet janë ndjerë fuqishëm edhe në shtetin fqinj, Guatemala. Si pasojë, Sistemi i Paralajmërimit për Cunami i Shërbimit Kombëtar të Motit të SHBA-së (NOAA) ka lëshuar paralajmërim për cunami për zonat bregdetare që ndodhen brenda një rrezeje prej 300 kilometrash nga epiqendra.
Deri në këto momente, autoritetet nuk kanë raportuar për viktima, të lënduar apo dëme materiale. Situata mbetet nën monitorim të vazhdueshëm nga organet përkatëse që po ndjekin zhvillimet në terren.
Përditësime
Shërbimi Gjeologjik i Shteteve të Bashkuara (USGS) e ka rishikuar magnitudën e tërmetit në 7.3, ndërsa sistemi sizmologjik meksikan ka regjistruar mbi 30 pasgoditje, më e forta prej të cilave me magnitudë 6.8. Epiqendra është lokalizuar 48 km larg Aquiles Serdan, me lëkundje të ndjera deri në El Salvador. Banorët në Tuxtla Gutierrez dhe Mexico City raportuan panik në ndërtesat e larta. Presidentja Claudia Sheinbaum dhe Sekretari i Marinës po koordinojnë reagimin emergjent dhe menaxhimin e situatës.
Pas tërmetit me magnitudë 7.4 në Meksikë, Qendra e Paralajmërimit të Tsunamit në Paqësor (PTWC) ka konfirmuar rrezikun e valëve të larta në rajon. Si pasojë, autoritetet kanë zgjeruar alarmin, ndërsa pamjet në rrjetet sociale tregojnë dëme në ndërtesa. Në Guatemala, qeveria ka urdhëruar evakuimin e institucioneve administrative për shkak të rrezikut nga pasgoditjet.
Autoritetet sizmike kanë vlerësuar rrezikun nga cunami pas tërmetit me magnitudë 7.4 në Meksikë. Priten dallgë me lartësi 0.3 deri në 1 metër përgjatë brigjeve të Meksikës dhe Guatemalës, ndërsa në Kolumbi, Kosta Rika, Ekuador, Honduras, Nikaragua, Panama dhe Peru, niveli i detit parashikohet të rritet me më pak se 0.3 metra.