Një tërmet me magnitudë 3.9 të shkallës Rihter është regjistruar në orën 09:46, sipas të dhënave nga Qendra Sizmologjike Evropiane-Mesdhetare (EMSC). Epiqendra e tërmetit është lokalizuar rreth 6 kilometra nga qendra e qytetit të Leskovcit, në Serbinë juglindore.
Sipas njoftimeve zyrtare, tërmeti është regjistruar në koordinatat gjeografike 42.95 (gjerësia) dhe 21.91 (gjatësia). Për shkak të thellësisë shumë të cekët, që vlerësohet pranë 0 kilometrave, lëkundjet janë ndier fuqishëm në Serbinë jugore, ndërsa efektet janë ndier edhe në disa pjesë të Kosovës.
Autoritetet kompetente po mbikëqyrin situatën pas aktivitetit sizmik. Deri në këtë moment, institucionet nuk kanë raportuar për dëme materiale në infrastrukturë apo për qytetarë të lënduar.