Një tërmet i fortë me magnitudë 6.5 ballë ka goditur të premten ishullin jugor Mindanao në Filipine. Sipas të dhënave të Shërbimit Gjeologjik të SHBA-së (USGS), epiqendra e lëkundjeve ishte pranë Sarangani, në Davao Occidental, ndërsa thellësia e vatrës sizmike është vlerësuar në 52.4 kilometra.
Sipas njoftimeve, lëkundjet kanë ndodhur në orën 19:34 sipas kohës lokale. Autoritetet nuk kanë raportuar për viktima apo dëme të menjëhershme pas kësaj ngjarjeje.
Kjo zonë është përballur me aktivitet sizmik edhe më parë. Më 8 qershor, një tërmet me magnitudë 7.8 ballë goditi brigjet e provincës Sarangani, duke shkaktuar shkatërrime të mëdha, 78 viktima dhe duke prekur rreth 1.5 milion banorë.
Filipinet mbeten një ndër vendet më të ekspozuara ndaj fatkeqësive natyrore në botë për shkak të pozicionit të tyre gjeografik përgjatë Unazës së Zjarrit të Paqësorit, një rajon që karakterizohet nga prania e lartë e vullkaneve dhe tërmeteve të shpeshta.