Gazeta britanike The Guardian ka botuar një analizë mbi protestat e vazhdueshme në Shqipëri, duke i cilësuar ato si shprehjen më të madhe të pakënaqësisë qytetare që nga rënia e komunizmit. Ajo që filloi si një reagim për mbrojtjen e lagunës së Zvërnecit dhe ishullit të Sazanit, është shndërruar në një lëvizje më të gjerë kundër qeverisjes së kryeministrit Edi Rama.
Sipas gazetës, qytetarët janë të zemëruar nga mungesa e transparencës për projektet shumëmilionëshe të mbështetura nga Jared Kushner dhe Ivanka Trump. Pavarësisht pretendimeve të qeverisë se marrëveshjet nuk janë finalizuar, publikimi i pamjeve me mjete të rënda në zonat bregdetare nxiti protestat. Kryeministri Edi Rama ka konfirmuar mbështetjen e tij për investimet, duke u shprehur se "nuk ka absolutisht asnjë shans që investimi të ndalet për sa kohë që unë jam këtu".
Analiza thekson se debati ka tejkaluar çështjet mjedisore, duke u përqendruar te kërkesat për llogaridhënie dhe një model të ri zhvillimi. Gazeta raporton se protesta ka reflektuar zhgënjimin ndaj klasës politike, ndërsa kryeministri Rama i ka lidhur këto reagime me ndjesi anti-Trump, një pretendim që protestuesit e kundërshtojnë, duke e lidhur lëvizjen me nevojën për demokraci dhe transparencë.
Ndërkohë, çështja ka tërhequr vëmendjen e eurodeputetëve, të cilët kanë kërkuar pezullimin e ndërtimeve në zona të mbrojtura, duke paralajmëruar se këto zhvillime mund të ndikojnë në procesin e integrimit të Shqipërisë në Bashkimin Evropian.