The Guardian ka publikuar një artikull të gjatë për rrugën e Kosovës në futbollin ndërkombëtar. Një fitore ndaj Turqisë të martën në mbrëmje do t’i siguronte Kosovës vendin e parë në finalet e Kupës së Botës. Kombi ballkanik u bë anëtar i FIFA-s vetëm në 2016, pas shpalljes së pavarësisë në 2008.
Artikulli bazohet në intervista me legjendën e Kombëtares, Samir Ujkani, dhe ish-sekretarin e Federatës së Futbollit të Kosovës, Eroll Salihu. Ujkani, ish-portier me përvojë në Serie A te Palermo dhe me 20 ndeshje për Shqipërinë, kujton marsin e 2014-s. Atëherë, skuadra e parë zyrtare e Kosovës u mblodh për ndeshjen kundër Haitit, duke arritur një barazim pa gola.
"Ne as nuk e njihnim njëri-tjetrin. Mund të them pa dyshim se në fillim nuk i dija 50% të emrave të djemve. Ishte vërtet e vështirë, por në zemrat tona ne gjithmonë përpiqeshim të përmirësoheshim dhe të besonim te njëri-tjetrin", thotë Ujkani. Ai e quan këtë rrugëtim një nga historitë më të mëdha suksesi në futbollin ndërkombëtar.
Kushtet ishin të vështira. Kosova stërvitej shpesh në një fushë të rrënuar në stadiumin e KEK-ut jashtë Prishtinës, pranë termocentraleve të Obiliqit, të listuara ndër më ndotëset në Evropë. Në raste të tjera, lojtarët udhëtonin tre orë vajtje-ardhje për në Mitrovicë për një seancë të vetme stërvitore.
"Të bën të mendosh për kushtet me të cilat u përballëm, të bën të mendosh emocionalisht. Nuk na interesonte, i bëmë të gjitha dhe askush nuk u ankua. Jam shumë krenar për atë që po arrin ekipi tani", shton Ujkani.
Qëllimi fillestar ishte njohja nga UEFA dhe FIFA. Edhe pse luante miqësore, skuadra pioniere nisi lojën pa anëtarësim të plotë. Tani, 12 vjet më vonë, Kosova është afër një arritjeje historike.