Portalet dhe gazetat online të Shqipërisë kanë përshkruar operacionin e forcave speciale amerikane për kapjen e Nicolas Maduro në Venezuelë, duke u ndalur te një detaj të veçantë. Në shumë tituj u përmend një "armë e re" e quajtur Anthropic, e paraqitur si teknologji sekrete e përdorur për herë të parë në operacion ushtarak.
Thoma Gëllçi sqaron se Anthropic nuk është armë. Kjo është një kompani amerikane e inteligjencës artificiale që zhvillon modele të mëdha për përpunimin e të dhënave dhe gjuhës. Këto sisteme nuk janë raketa, dronë apo sisteme artilerie, por mund të analizojnë informacionin dhe të ndihmojnë në vendimmarrjen për përdorimin e armëve.
Përdorimi i inteligjencës artificiale në konfliktet e fundit është shtuar. Në luftërat moderne, algoritmi nuk është predha apo arma, por shqetësimi është se po kalon nga mjet ndihmës në vendimmarrës. Ai identifikon objektiva dhe planifikon operacione.
Në luftën mes Ukrainës dhe Rusias, të dy palët përdorin inteligjencën artificiale për të përpunuar të dhëna nga dronët, radarët dhe satelitët.
• Ukraina përdor sisteme analize për të identifikuar pozicione artilerie dhe lëvizje trupash nga video dhe imazhe satelitore në kohë të shkurtër. Për t’iu kundërvënë teknologjisë bllokuese të valëve ruse, prodhon dronë plotësisht autonomë që veprojnë pa komanda qendrore.
• Rusia ka zhvilluar sisteme të ngjashme. Dronët e zbulimit përdorin algoritme për njohjen e objekteve dhe analizën e terrenit, ndërsa sistemet e luftës elektronike përpunojnë në kohë reale të dhëna nga radarët dhe komunikimet për koordinim dhe vendime.