Ndeshja përgatitore e Juventusit kundër ekipit Next Gen përfundoi me fitoren 2-0 të skuadrës së parë, por sfida nuk u zhvillua deri në fund. Pak sekonda pas fillimit të pjesës së dytë, tifozët hynë në fushë, duke detyruar gjyqtarin që të sinjalizonte përfundimin e takimit.
Sipas njoftimit zyrtar të Juventusit, trajneri Luciano Spalletti kishte planifikuar një formacion të ndryshëm për pjesën e dytë, por tifozët vepruan përpara se lojtarët të mund të futeshin në lojë. Klubi shpjegoi se hyrja e tifozëve është një traditë e njohur që daton prej 67 vjetësh, e cila ka për qëllim afrimin e tifozëve me lojtarët dhe krijimin e një atmosfere familjare.
Në mesin e lojtarëve që tërhoqi vëmendjen kryesore ishte reprezentuesi i Kosovës, Edon Zhegrova. Video të publikuara në rrjetet sociale tregojnë dhjetëra tifozë duke u mbledhur rreth tij për të kërkuar fotografi dhe fanellën. Në disa raste, situata kërkoi ndërhyrjen e sigurimit për ta ndihmuar futbollistin që të largohej drejt dhomave të zhveshjes, pasi disa tifozë tentuan t’ia merrnin fanellën me forcë. Pavarësisht këtyre momenteve, pjesa tjetër e takimit u përshkrua nga buzëqeshje dhe shkëmbime mes lojtarëve dhe mbështetësve.