Deputetja e AAK-së, Time Kadriaj, ka dhënë detaje mbi ngjarjen e ndodhur në sallën e Kuvendit të Kosovës, ku ajo hodhi vezë në drejtim të Albin Kurtit. Në një intervistë për emisionin Frontal në televizionin T7, ajo sqaroi se vendimi për këtë veprim u mor menjëherë pasi u njoftua shtyrja e seancës konstituive.
Kadriaj u shpreh se nuk do të kishte ndërmarrë një veprim të tillë nëse seanca do të kishte vijuar me konstituimin e Kuvendit. Lidhur me përgatitjen e aksionit, ajo pranoi se i kishte marrë vezët me vete paraprakisht për çdo rast. Në total, ajo kishte përgatitur rreth 7 vezë, të cilat i hodhi të gjitha gjatë incidentit.
Deputetja nuk dha sqarime lidhur me mënyrën se si arriti t’i fuste vezët brenda sallës së Kuvendit, duke u shprehur se nuk është në dijeni nëse ato mund të detektohen nga kontrollet e sigurisë. Megjithatë, ajo bëri një dallim midis vezëve dhe mjeteve të tjera si bombolat apo gazi lotsjellës. Fokusimi i saj kryesor, siç deklaroi ajo, ishte përmbushja e obligimit që i kishte dhënë vetes, duke konfirmuar se cak i vezëve ka qenë ekskluzivisht Albin Kurti.