Seksioni për Hetimin e Krimeve Ekonomiko-Financiare, nën drejtimin e Prokurorisë së Tiranës, ka zbardhur një skemë të mashtrimit kompjuterik. Pas kallëzimit të bërë nga një 34-vjeçar, hetuesit zbuluan se viktima ishte manipuluar nëpërmjet një platforme komunikimi online.
Sipas hetimeve, autorët kanë hyrë në komunikim me viktimën duke u prezantuar rrejshëm si të afërm të tij (biznesmenë), për të siguruar shumën e parave nën pretekstin e një emergjence. 34-vjeçari, duke besuar se po ndihmonte një person të njohur, ia ka dorëzuar shumën prej 60 000 euro shtetasit N. V..
Në kuadër të operacionit të koduar "Wrong Idea", policia arrestoi në flagrancë N. V. dhe S. F., ndërsa vazhdon operacioni për gjetjen dhe kapjen e shtetasit F. Gj., i cili dyshohet si bashkëpunëtor në këtë veprimtari kriminale.
Policia e Shtetit apeloi sërish për qytetarët që të tregojnë vigjilencë në komunikimet virtuale dhe të mos kryejnë transaksione financiare pa u siguruar më parë, përmes verifikimit të drejtpërdrejtë, për identitetin e personave që kërkojnë para.