Për të 33-ën ditë radhazi, qytetarët janë mbledhur në Tiranë për të protestuar kundër qeverisë. Pas një tubimi të zhvilluar paraditen e së enjtes përpara Kuvendit të Shqipërisë, protestuesit marshuan në mbrëmje nga sheshi “Skënderbej” drejt bulevardit “Dëshmorët e Kombit”, duke u stacionuar përpara Kryeministrisë.
Protesta e paradites u karakterizua nga tensione të larta. Organizatorët kishin njoftuar paraprakisht përdorimin e vezëve dhe miellit si mjet proteste ndaj deputetëve, të cilët sipas tyre nuk përfaqësojnë votuesit. Gazetari Klevin Muka, i autorizuar nga Grupi Koordinues, pretendoi se qytetarët u dhunuan nga truprojat e ministrit Ulsi Manja pranë Kuvendit, duke shkaktuar lëndime fizike. Muka dhe aktivistë të tjerë, përfshirë Arben Kolën e Ilir Xhemalajn, raportuan gjithashtu se Policia e Shtetit ndërhyri me shkopinj gome dhe gaz lotsjellës për të shpërndarë protestuesit që ndodheshin përpara Parlamentit, duke kryer edhe arrestime.
Kërkesat kryesore të protestuesve janë:
• Dorëheqja e kryeministrit Edi Rama.
• Lirimi i personave të arrestuar gjatë përplasjeve.
• Shfuqizimi i ndryshimeve në ligjin për zonat e mbrojtura.
• Ndryshimi i ligjit zgjedhor dhe largimi i kastës së vjetër politike.
Organizatorët theksuan se protesta do të vijojë të mbetet paqësore, pavarësisht përballjeve me forcat e rendit. Ata bënë thirrje për ruajtjen e qetësisë dhe mosrënien pre e provokimeve, duke u shprehur se qëndresa do të vazhdojë deri në përmbushjen e kërkesave të tyre.