Deputeti i Partisë Demokratike (PD), Tomor Alizoti, deklaroi në emisionin „Kjo Javë” se është kundër përjashtimit të individëve nga partia që mendojnë ndryshe nga lidershipi.
I pyetur për Ervin Salianjin dhe lëvizjen e tij për reformimin e PD, Alizoti tha se një person që kontribuon në parti dhe identifikohet me të nuk përjashtohet.
„Partia nuk i përket askujt, partia është bashkim vullnetar i njerëzve. Kur një njeri kontribuon në PD dhe identifikohet me PD, nuk përjashtohet. Unë jam për çdo individ brenda partisë që të mos ketë përjashtime. Kanë mendime të tyre, ndaj kemi vuajtur 50 vjet që të kemi mendime të lira”, u shpreh deputeti.
Alizoti vlerësoi se Salianjit i është bërë padrejtësi me burgosjen e tij të padrejtë dhe se e ka vizituar sa herë ka pasur mundësi.
Ai kujtoi gjithashtu një rast në të shkuarën kur Lulzim Basha kërkonte përjashtimin e Myslim Murrizit, kundër të cilit kishte qenë.