Gjatë seancës plenare në Kuvend, deputetja e Partisë Demokratike e Shqipërisë, Jozefina Topalli, foli për projektligjin për Shërbimin e Jashtëm dhe theksoi se korrupsioni mbetet sfida kryesore për vendin.
Ajo e quajti korrupsionin "armiku më i madh i Shqipërisë", duke shtuar se ky fenomen pengon rrugën drejt integrimit europian. "Shqipëria do të ishte krejt tjetër në procesin e integrimit nëse në vitin 2013 Rama nuk do të refuzonte miratimin e tre ligjeve që kërkonte BE", u shpreh Topalli.
Sipas saj, korrupsioni nuk është thjesht vjedhje, por minim i shtetit dhe institucioneve të tij. Deputetja nënvizoi se pa luftuar këtë fenomen në themel, nuk mund të ketë përparim real në integrimin europian.
Diskutimi u shoqërua me debate dhe qëndrime kritike nga opozita, ndërsa projektligji për Shërbimin e Jashtëm vazhdoi të shqyrtohet në seancë plenare.