Operacioni i shpëtimit u zhvillua të mërkurën në mbrëmje, kur shërbimi detar spanjoll SASEMAR lokalizoi një varkë të improvizuar rreth 65 milje detare (afërsisht 120 kilometra) në jugperëndim të portit të Arguineguín. Në bord u gjetën 44 të mbijetuar, tre prej të cilëve, për shkak të gjendjes kritike shëndetësore, u dërguan me helikopter në spital.
Sipas informacioneve të bëra të ditura nga drejtuesja e OJQ-së Caminando Fronteras, Helena Maleno, mjeti lundrues ishte nisur nga Gambia 27 ditë më parë. Ndonëse autoritetet zyrtare konfirmuan praninë e pesë trupave të pajetë të cilët nuk mundën të nxirreshin në bord për shkak të dallgëve që arrinin deri në 2.5 metra, organizata paralajmëroi se numri i viktimave mund të jetë shumë më i lartë, duke referuar një shifër prej 83 humbjesh jete nga një grup që fillimisht numëronte 127 ose 128 persona.
Burime të ndryshme, duke iu referuar dëshmive të të mbijetuarve, theksojnë se mes personave që humbën jetën gjatë këtij udhëtimi përfshihen gra dhe fëmijë. Rruga e Atlantikut nga Afrika Perëndimore drejt Ishujve Kanarie vazhdon të mbetet një nga itineraret më të rrezikshme për migrantët, të cilët ndërmarrin udhëtime të gjata me mjete lundruese të papërshtatshme.