Mesditën e 22 qershorit, dy fëmijë të moshës 2 dhe 4 vjeç janë gjetur pa jetë brenda automjetit të familjes së tyre në qytetin e Carpentras, në jug të Francës. Zbulimi i fëmijëve u bë rreth orës 13:10, pasi nëna e tyre 33-vjeçare ishte kthyer nga pazari. Pavarësisht ndërhyrjes së shpejtë të ekipeve të emergjencës për t'i dhënë ndihmën e parë, fëmijët nuk mundën të mbijetonin.
Prokurorja e Carpentras, Helene Mourez, deklaroi se shkaqet e sakta të vdekjes mbeten ende në proces hetimi. Megjithatë, temperaturat e larta në rajon, të cilat kanë arritur vlerat 39°C, po hetohen si një ndër faktorët kryesorë të kësaj tragjedie. Hetimet paraprake sugjerojnë mundësinë që fëmijët të kenë hyrë në automjetin e parkuar pranë banesës pa dijeninë e nënës së tyre.
Ngjarja ka ndodhur në një periudhë kur Franca po përballet me një valë të rëndë të nxehti. Autoritetet franceze kanë shpallur nivelin maksimal të alarmit në 49 departamente, duke prekur mbi 90% të popullsisë. Për shkak të këtyre kushteve atmosferike, të cilat pritet të vazhdojnë deri në fund të javës, janë marrë masa kufizuese, duke përfshirë mbylljen e mbi 1,300 shkollave dhe rregullimin e orareve mësimore në shumë institucione të tjera arsimore në të gjithë vendin.