Tre grupe opozitare në Shqipëri kanë njoftuar protesta kundër kryeministrit Edi Rama, por pa koordinim mes tyre. Adriatik Lapaj i lëvizjes Shqipëria Bëhet ka thirrur protesta ditore, që parashikon të bëhen masive të shtunën para Kryeministrisë në orën 18:00. Shërbimi i Gardës ka nisur blindimin e dyerve të Kryeministrisë.
Arlind Qori ka synuar Parlamentin, që hap dyert të hënën. Demokratët kanë rezervuar fundin e janarit për protestën e tyre. Qëllimi i përbashkët është rrëzimi i qeverisë, por kalendari i protestave nuk ka pikë takimi.
Arlind Qori shpjegoi refuzimin e bashkimit të kryetarëve: "Historia e dekadës së fundit të Shqipërisë ka parë koalicione, bashkime, pazare nga më të paskrupulltat. Njerëz që i thonë njëri-tjetrit aleat, vëllezër, motra, dhe pastaj shahen dy-tre muaj, çfarë nuk thonë për njëri-tjetrin. Për këtë arsye kemi refuzuar bashkimin e kryetarëve dhe kërkojmë bashkimin e popullit, të njerëzve të ndershëm dhe të punës".
Adriatik Lapaj theksoi nevojën për qeveri tranzitore: "I vetmi kusht logjik që kemi vendosur [...] është që ta lëmë partinë tek selia, sepse ka një kohë për partinë, që janë zgjedhjet, dhe ka një kohë për Shqipërinë, që është nevoja për zgjedhje të parakohshme përmes një qeverie tranzitore dhe një reformim përfundimtar për ta lënë tranzicionin pas".
Dallimi tjetër është koha e zgjedhjeve të parakohshme. Qori kundërshton qeverinë teknike si "bashkëqeverisje Rama-Berisha" dhe kërkon zgjedhje të menjëhershme: "Le ta nisim nga zgjedhjet e parakohshme, Edi Rama është në ditën e tij më të vështirë dhe hekuri duhet të trihet sa është i nxehtë". Lapaj propozon qeveri tranzitore si zgjidhje politike në kushtet aktuale.