Presidenti i Shteteve të Bashkuara, Donald Trump, deklaroi në një intervistë se ushtrisë amerikane do t'i mjaftonin dy javë për të goditur të gjitha objektivat në Iran. Deklarata u bë gjatë një bisede me gazetaren e pavarur Sharyl Attkisson.
Trump theksoi se Republika Islamike është e mundur ushtarakisht. "Janë të mundur ushtarakisht. Në mendjen e tyre, ndoshta nuk e dinë. Por mendoj se e dinë", tha ai, duke shtuar: "Kjo nuk do të thotë që kanë mbaruar."
Sipas tij, SHBA-ja ka goditur rreth 70% të objektivave të planifikuara, ndërsa të tjerët mbeten ende të mundshëm për sulm. "Ushtria amerikane mund të ndërhyjë për dy javë të tjera dhe të godasë çdo objektiv", u shpreh Trump. Ai përmendi se edhe nëse nuk kryhen goditje të mëtejshme, do të ishin vetëm "prekjet e fundit".
Në të njëjtën intervistë, Trump kritikoi NATO-n, duke e cilësuar atë si një tigër letre. Ai akuzoi aleatët e Uashingtonit se nuk kanë ofruar ndihmë në fushatën kundër Teheranit.
Intervista u publikua ndërsa Irani njoftoi se i ishte përgjigjur propozimit të fundit amerikan, i cili synon t'i japë fund konfliktit midis Iranit dhe SHBA-së, shpërthyer më 28 shkurt.