Donald Trump, presidenti i Shteteve të Bashkuara, shprehu dyshime nëse disidenti iranian në mërgim, Reza Pahlavi, mund të sigurojë mbështetje të mjaftueshme brenda Iranit për të udhëhequr vendin pas një tranzicioni të mundshëm politik. Komentet u bënë të mërkurën në një intervistë për Reuters, nga Zyra Ovale.
Trump e përshkroi Pahlavi-n si “shumë simpatik”, por theksoi pasigurinë për pranimin e tij nga iranianët. “Ai duket shumë simpatik, por nuk e di se si do të pranohej brenda vendit të tij”, tha Trump. “Dhe, sinqerisht, ende nuk kemi arritur në atë pikë. Nuk e di nëse vendi i tij do ta pranonte udhëheqjen e tij dhe sigurisht nëse do ta bënte, kjo do të ishte e pranueshme edhe për mua”.
Ai lëshoi të hapur mundësinë e shembjes së regjimit teokratik të Teheranit, pa dhënë parashikime për kohën ose shkaqet. Edhe pse ka kërcënuar të ndërhyjë në mbështetje të protestave antiqeveritare në Iran, Trump u shfaq i kujdesshëm për të dhënë mbështetje të plotë politike Pahlavi-t, djalit të Shahut të fundit, të rrëzuar në Revolucionin Islamik të vitit 1979.
Deklaratat forcojnë dyshimin për rolin udhëheqës të Pahlavi-së në një tranzicion, veçanërisht pas deklaratës së Trump javën e kaluar se nuk kishte ndërmend të takohej me të.
Reza Pahlavi, 65 vjeç, jeton në Shtetet e Bashkuara dhe ka qenë jashtë Iranit që para rrëzimit të babait të tij. Ai është bërë zë i shquar i opozitës jashtë vendit, duke mbështetur protestat antiqeveritare dhe duke u bërë thirrje protestuesve për revoltë, si dhe duke u zotuar të kthehet në Iran.