Presidenti i SHBA-së, Donald Trump, deklaroi në një intervistë telefonike me agjencinë Reuters se Irani dëshiron të flasë dhe të paraqesë një propozim që synon përmbushjen e kërkesave amerikane në negociata.
"Ata po paraqesin një propozim dhe do ta shohim", tha Trump, duke shtuar se ende nuk di çfarë mund të përmbajë oferta.
Trump u shpreh se zyrtarët amerikanë po negociojnë me "njerëzit përgjegjës tani" në Iran, pa zbuluar identitetin e tyre. Ai nuk dha detaje të mëtejshme për kontaktet e deritanishme.
Nga ana tjetër, zhvillime diplomatike kanë ndodhur në orët e fundit. Ministri i Jashtëm iranian, Abbas Araghchi, ka mbërritur në Islamabad. I dërguari special i Trump-it, Steve Witkoff, dhe dhëndri i presidentit, Jared Kushner, pritet të shkojnë atje të shtunën, ndërsa zëvendësspresidenti J.D. Vance nuk do të jetë i pranishëm.
Nuk është e qartë nëse do të ketë takime midis delegacioneve iraniane dhe amerikane. Araghchi planifikon takime dypalëshe me ndërmjetësit pakistanezë. Agjencia e lajmeve Fars, e lidhur me Gardën Revolucionare Iranianë, ka kritikuar udhëtimin e Araghchi-t, duke e quajtur atë pranim të bisedimeve të konsideruara "të kushtueshme" dhe "të pakuptimta".
Trump ka folur gjithashtu për vizitën e Mbretit Charles në SHBA javën e ardhshme, ku planifikon të diskutojë çështje si Irani dhe NATO-ja.