Presidenti i Shteteve të Bashkuara, Donald Trump, mbajti një konferencë shtypi në Shtëpinë e Bardhë, ku komentoi tensionet me Iranin dhe një rrjedhje informacioni lidhur me një pilot amerikan të rrëzuar në territorin iranian.
Sipas Trump-it, një person, ndoshta gazetar ose përfaqësues i medias, zbuloi të dhëna për zhdukjen e këtij piloti. Kjo bëri që Irani ta dinte ekzistencën e tij dhe të nisë kërkimet, duke vënë në rrezik jetën e pilotit dhe duke komplikuar operacionin e shpëtimit amerikan. "Ai që bëri këtë do shkojë në burg", tha Trump, duke shtuar se do të kërkojë nga organizata mediatike emrin e personit për siguri kombëtare.
Trump theksoi se rrjedhja e informacionit e vendosi misionin në rrezik të madh, pasi Irani nuk e dinte për pilotin derisa u bë publik.
Në të njëjtën konferencë, Trump deklaroi se Irani mund të shkatërrohet brenda një nate, ndoshta "nesër në mbrëmje". Ai përmendi mundësinë e goditjeve ndaj termocentraleve, urave dhe infrastrukturës kyçe, nëse Teherani nuk arrin një marrëveshje ose nuk rihap Ngushticën e Hormuzit, rrugën kryesore të tregtisë së naftës.