Trump nxiti kompanitë e naftës të investojnë shpejt në Venezuelë

Pas kapjes së Maduro-s, Presidenti amerikan Donald Trump priti përfaqësues të kompanive të naftës dhe i nxiti të vepronin shpejt dhe në shkallë të gjerë në Venezuelë. Qeveria e SHBA-së premton qasje afatgjatë dhe kontroll mbi sektorin e naftës atje. Megjithatë, industria e naftës amerikane nuk shfaq entuziazëm për shkak të arsyeve ekonomike.

Kompanitë të kujdesshme

Venezuela pretendon rezervat më të mëdha në botë, mbi 300 miliardë fuçi naftë bruto, por këto nuk janë verifikuar kurrë. Disa vlerësime tregojnë se sasia reale është më pak se një e treta e kësaj. Skepticizmin rrit fakti se bëhet fjalë për naftë të rëndë bruto, e cila kërkon rafineri të specializuara.

Eksperti Bob McNally deklaroi për CNN se “kjo sigurisht i josh kompanitë e naftës. Ato janë mësuar me vende të rrezikshme. [...] Por ato do të jenë shumë, shumë të kujdesshme.” Mukesh Shadev nga firma konsulente XAnalysts shpjegoi për Bloomberg TV se “numri i rafinerive në SHBA dhe gjetkë që duan këtë naftë po zvogëlohet”, pasi bota lëviz drejt konsumit më të ulët të benzinës dhe naftës.

A ia vlen investimi?

Prodhimi global i naftës arrin rreth 105 milionë fuçi në ditë, 2 milionë fuçi më shumë se nevoja. Çmimi aktual është rreth 60 dollarë për fuçi. Eksperti Peter Boockvar u shpreh për CNBC se njëzet vjet më parë çmimi nominal ishte po 60 dollarë, por i përshtatur me inflacionin, ato vlejnë 100 dollarë sot. Njëkohësisht, kostoja e nxjerrjes së naftës nga toka është shumë më e lartë tani.

Qeveria amerikane synon të sigurojë qasje afatgjatë tek nafta venezueliane, por pyetja nëse kjo e bën investimin fitimprurës për gjigantët e naftës mbetet e hapur.