Presidenti i SHBA-së, Donald Trump, deklaroi se mund t’i japë fund armëpushimit me Iranin, nëse deri të mërkurën nuk arrihet një marrëveshje afatgjatë për përfundimin e konfliktit. Ky paralajmërim u bë gjatë një prononcimi për gazetarët në bordin e avionit presidencial Air Force One, ndërsa kthehej nga Phoenix drejt Uashingtonit.
Trump theksoi se, edhe nëse armëpushimi nuk zgjatet, bllokada ndaj porteve iraniane do të vazhdojë të jetë në fuqi. “Ka gjasa që të mos e zgjasim armëpushimin, por bllokada do të mbetet”, u shpreh ai. Presidenti amerikan shtoi se, në mungesë të një marrëveshjeje konkrete, veprimet ushtarake mund të rifillojnë. “Pra, ekziston një bllokadë dhe, fatkeqësisht, mund të na duhet të fillojmë sërish bombardimet”, deklaroi Trump.
Situata mbetet e pasigurt dhe vendimet e ardhshme do të varen nga zhvillimet diplomatike në ditët në vijim. Megjithatë, pak më herët, Trump kishte përmendur se kishte disa lajme mjaft të mira në lidhje me zhvillimet që përfshijnë Iranin, pa dhënë detaje konkrete.
Përditësime
Negociatat midis SHBA-së dhe Iranit vazhdojnë gjatë fundjavës.
• Bllokada amerikane nisi të hënën.
• Irani pretendon se do të heqë bllokadën në Ngushticën e Hormuzit dhe paralajmëron veprime nëse ajo vazhdon.
• Armëpushimi ishte dyjavësh.