Presidenti i Shteteve të Bashkuara Donald Trump ka publikuar në platformën Truth Social një imazh të krijuar me inteligjencë artificiale, i shoqëruar me mesazhin “Qetësia para stuhisë”. Në imazh Trump duket me kapelën “MAGA” dhe drejton gishtin drejt kamerës, i rrethuar nga anije ushtarake në ujëra të trazuara dhe flamuj iranianë, ndërsa në sfond shihen re të errëta dhe rrufe.
Postimi vjen në një periudhë tensionesh të larta në Lindjen e Mesme. Sipas gazetës The New York Times, Shtetet e Bashkuara dhe Izraeli po zhvillojnë përgatitjet më intensive për veprime të mundshme kundër Iranit që nga armëpushimi i muajit të kaluar. Dy zyrtarë të Lindjes së Mesme kanë deklaruar se vendet synojnë të jenë gati për veprim që javën e ardhshme.
Deri tani Shtëpia e Bardhë nuk ka dhënë asnjë reagim zyrtar lidhur me postimin apo raportimet për përgatitje ushtarake. Situata mbetet në zhvillim.