Presidenti i Shteteve të Bashkuara, Donald Trump, ka shfuqizuar të enjten, më 12 shkurt 2026, gjetjen e rrezikshmërisë së vitit 2009 të Agjencisë për Mbrojtjen e Mjedisit (EPA). Ky vendim, i marrë gjatë administratës së ish-presidentit Barack Obama, përcaktonte se gjashtë gaze kryesore serrë, si dioksidi i karbonit dhe metani, përbëjnë rrezik për shëndetin publik dhe shërbenin si bazë ligjore për kufizimin e emetimeve në sektorë si automjetet, centralet elektrike, industria e naftës dhe gazit, si dhe aviacioni.
Duke folur nga Zyra Ovale, Trump e cilësoi vendimin e vitit 2009 si "politikë katastrofike të epokës Obama", që sipas tij dëmtoi industrinë amerikane të automobilave dhe rriti çmimet për qytetarët. Ai e lidhi atë me axhendën klimatike të demokratëve, duke e quajtur "Green New Scam". Shtëpia e Bardhë bëri të ditur se shfuqizimi ul kostot për prodhuesit e automjeteve me 2.400 dollarë për çdo automjet, duke i bërë makinat më të lira.
Ish-presidentit Barack Obama reagoi në rrjetin social X, duke thënë se ky veprim bën amerikanët "më pak të sigurt dhe më pak të shëndetshëm", ndërsa favorizon industrinë e karburanteve fosile.
Organizatat mjedisore e kanë quajtur këtë tërheqjen më të madhe nga politikat klimatike në histori dhe kanë paralajmëruar sfidim të menjëhershëm në gjykatë. Peter Zalzal nga Environmental Defense Fund vlerësoi se masa mund të kushtojë amerikanëve 1,4 trilion dollarë shtesë në shpenzime për karburant, të shkaktojë deri në 58 mijë vdekje të parakohshme dhe 37 milionë raste shtesë të krizave të astmës. Ekspertë të së drejtës klimatike paralajmërojnë se prodhimi i automjeteve më pak efikase mund të dëmtojë konkurrueshmërinë e prodhuesve amerikanë në tregjet ndërkombëtare me standarde më të rrepta mjedisore.