Presidenti i Shteteve të Bashkuara, Donald Trump, ka lëshuar një paralajmërim të ashpër ndaj Iranit, duke deklaruar se autoritetet në Teheran kanë afat deri nesër në orën 08:00 për të vepruar. Gjatë një komunikimi me gazetarët, Trump u shpreh se po negociojnë me "mirëbesim", por theksoi se pas këtij afati pasojat do të jenë shkatërrimtare.
"Ata kanë kohë deri nesër në orën 08:00. Do të shohim se çfarë do të ndodhë. Pas kësaj ore, nuk do të kenë ura dhe stacione", deklaroi presidenti amerikan. Ai paralajmëroi se, në rast të përshkallëzimit të situatës, do të pasonte një "shkatërrim total" dhe se rindërtimi i vendit do t'u merrte rreth 100 vjet.
Ndër të tjera, Trump përsëriti vendosmërinë për të mos lejuar Iranin që të pajiset me armë bërthamore. Ai konfirmoi gjithashtu se SHBA-ja do të vendosë taksa në Ngushticën e Hormuzit, duke shtuar se vendi i tij është në pozitë fituese. Përtej çështjes së Iranit, presidenti amerikan deklaroi se është "shumë i zhgënjyer me NATO-n", pa dhënë detaje shtesë mbi arsyet e këtij qëndrimi.