Rrahman Kasa, kreu i Unionit Turistik Shqiptar, ka deklaruar se Shqipëria pret një rritje deri në 10% të numrit të turistëve huaj këtë sezon, krahasuar me vitin rekord 2025. Kjo vjen pavarësisht pasigurisë gjeopolitike në Lindjen e Mesme, që po ndryshon hartën turistike evropiane.
Shqipëria po konfirmohet si destinacion kryesor dhe i sigurt. Operatorët turistikë nuk presin goditje negative; përkundrazi, parashikojnë rritje të vizitorëve. Ky trend rritës buron kryesisht nga Gjermania dhe Polonia, të cilat ridrejtojnë prenotimet drejt Shqipërisë, duke e parë atë si një “ishull sigurie”.
Ndikimi negativ i konflikteve në Lindjen e Mesme perceptohet vetëm në turizmin dalës. Kjo situatë do të rrisë numrin e shqiptarëve që do të pushojnë brenda vendit. Operatorët vërejnë anulime të fluturimeve drejt Dubait, frenim të prenotimeve drejt zonave jugore të Turqisë dhe Egjiptit, për shkak të pasigurisë dhe rishikimit të linjave ajrore.