Ministria e Mbrojtjes Kombëtare e Turqisë ka paralajmëruar Greqinë pas raportimeve për aktivitete ushtarake greke në Egjeun Lindor. Athina akuzohet se shkel statusin demilitarizuar të ishujve, në kundërshtim me traktatet e paqes të Lozanës së vitit 1923 dhe Parisit të vitit 1947.
Në një konferencë javore për shtyp të enjten, ministria deklaroi: “Iniciativat e Greqisë që shkelin statusin e ishujve në kundërshtim me traktatet e përfunduara, krijojnë paligjshmëri dhe dëmtojnë marrëdhëniet tona fqinje dhe aleate”. Ajo shtoi: “Ne nuk i pranojmë iniciativat e Greqisë që nuk i shërbejnë qëllimit të vërtetë dhe synojnë t’i shndërrojnë krizat në rajonin tonë, në mundësi”.
Deklarata ka bërë jehonë edhe në median greke. Zëdhënësi i ministrisë, admirali Zeki Aktürk, konfirmoi vendosjen e një sistemi mbrojtës raketor Patriot, të caktuar nga Komanda Ajrore Aleate e NATO-s (AIRCOM) në Ramstein të Gjermanisë, në Malatya, si element plotësues i mbrojtjes ajrore turke.
Turqia ka stacionuar gjithashtu gjashtë avionë luftarakë F-16 së bashku me sisteme mbrojtëse ajrore në Republikën Turke të Qipros Veriore (TRNC). Këto masa vijnë ndërsa pasojat e luftës SHBA-Izrael kundër Iranit vazhdojnë të prekin territorin turk. Aktürk raportoi se një raketë e dytë balistike iraniane u kap më 9 mars, pas hyrjes në hapësirën ajrore turke, me mbeturina që ranë në zona të zbrazëta të Gaziantepit dhe Diyarbakir-it. Nuk raportohet për viktima ose lëndime.