Federata Shqiptare e Futbollit (FSHF) ka njoftuar tifozët kuqezi që do të ndjekin nga afër sfidën e sotme ndërmjet San Marinos dhe Shqipërisë në stadiumin “San Marino Stadium”, duke vënë theksin te rregullat për aksesin në impiant dhe parkimin e automjeteve.
Sipas njoftimit, rruga “Rancaglia” pranë stadiumit do të jetë e mbyllur për qarkullimin e mjeteve motorike, por mbetet plotësisht e kalueshme për këmbësorët. Për të mbërritur te zona e parkimit të dedikuar, e cila gjendet te “Stadio di Baseball di Serravalle”, tifozët udhëzohen të ndjekin rrugët “La Ciraulla” ose “Costa del Bello”.
Duke qenë se kapaciteti i parkimit të dedikuar është i kufizuar, FSHF u bën thirrje tifozëve që të planifikojnë lëvizjen e tyre drejt stadiumit në kohë dhe të shqyrtojnë mundësinë e shfrytëzimit të parkimeve të tjera publike në qytet. Gjithashtu, “Via Rancaglia” është caktuar si pika kryesore e grumbullimit për mbështetësit shqiptarë para fillimit të ndeshjes. Institucioni ka kërkuar nga të gjithë pjesëmarrësit respektimin e udhëzimeve për të garantuar një organizim të rregullt dhe shmangien e mbipopullimit apo vështirësive gjatë hyrjes në stadium.