Mjekë të Ushtrisë Britanike zbarkuan me parashutë në ishullin Tristan da Cunha, në Oqeanin Atlantik Jugor, për të ndihmuar një shtetas britanik të dyshuar për infeksion me hantavirus.
Shtetasi kishte lënë anijen turistike MV Hondius, e prekur nga një shpërthim vdekjeprurës i virusit në mes të prillit, dhe kishte mbërritur në këtë territor britanik të jashtëm, një nga vendbanimet më të izoluara në botë me vetëm 221 banorë dhe pa aeroport. Ai shfaqi simptoma dy javë pas largimit dhe ndodhet në gjendje të qëndrueshme, në izolim.
Ministria e Mbrojtjes britanike (MoD) njoftoi se një avion RAF A400M hodhi furnizime oksigjeni, pasi rezervat në ishull kishin arritur nivele kritike. Operacioni u krye nga Brigada 16 Ajrore Sulmuese, me një ekip prej 6 parashutistësh, një mjeku dhe një infermiere kujdesi intensiv. Avioni u ngrit nga baza RAF Brize Norton, me ndalesë në Ascension Island, dhe u mbështet nga një avion furnizimi RAF Voyager.
Parashutistët u hodhën rreth 5 km mbi oqean, duke u ulur në një zonë të hapur për shkak të erërave të forta dhe kushteve ekstreme të motit. Transporti detar nuk ishte i mundur për shkak të gjendjes së pacientit dhe mungesës së oksigjenit.
Në total, janë konfirmuar 6 raste me hantavirus, përfshirë dy shtetas britanikë të tjerë që trajtohen në Holandë dhe Afrikën e Jugut. Organizata Botërore e Shëndetësisë (OBSH) raporton gjithashtu 2 raste të dyshuara. Autoritetet britanike theksojnë se rreziku për publikun e gjerë mbetet shumë i ulët.
Ministrja e Jashtme britanike Yvette Cooper deklaroi se operacioni tregon angazhimin e Britanisë për mbrojtjen e qytetarëve të saj kudo në botë.