Gjatë periudhës 22–28 qershor, Europa u përball me një valë të nxehti që solli një rritje të ndjeshme të vdekshmërisë. Sipas të dhënave paraprake të përpiluara nga Agence France-Presse (AFP), rreth 10 mijë vdekje shtesë u regjistruan në Gjermani, Francë, Belgjikë, Spanjë, Holandë, Zvicër dhe Luksemburg. Në Angli dhe Uells, numri i viktimave vlerësohet të jetë rreth 2,200, duke e çuar totalin në mbi 12 mijë.
Platforma europiane EuroMOMO, e cila monitoron vdekshmërinë në 24 vende, raportoi për të njëjtën periudhë 14,260 vdekje shtesë. Ekspertët theksojnë se metodologjia e numërimit ndryshon midis shteteve dhe të dhënat kërkojnë rreth katër javë për t'u përcaktuar me saktësi.
Ndër vendet më të prekura, Gjermania regjistroi 5,780 vdekje mbi mesataren e katër viteve të fundit, ndërsa në Francë u raportuan mbi 2,000 viktima. Në Spanjë, sistemi i monitorimit MoMo i atribuoi 610 vdekje temperaturave të larta, ku shumica e viktimave i përkasin moshës së tretë.
Drejtori rajonal i Organizatës Botërore të Shëndetësisë (OBSH) për Europën, Hans-Henri Kluge, bëri thirrje që qeveritë të ndryshojnë qasjen ndaj këtyre dukurive. “Shumë qeveri ende e konsiderojnë nxehtësinë si një fenomen meteorologjik dhe jo si një emergjencë shëndetësore”, deklaroi ai. Epidemiologu Lasse Festergaard, koordinator i EuroMOMO, theksoi se nuk ka shkaqe të tjera përveç nxehtësisë që mund të shpjegojnë këtë rritje të vdekshmërisë, duke e cilësuar situatën si tragjike.