Fede Valverde, mesfushori uruguaian i Real Madrid, u rikthye të premten në stërvitjen e skuadrës për herë të parë që nga përplasja me bashkëlojtarin Aurélien Tchouaméni në ambientet e klubit javën e kaluar.
Incidenti, i raportuar si konflikt fizik nga mediat, u mohua nga Valverde, i cili deklaroi se nuk pati shkëmbim grushtash. Klubi i drejtoi të dy lojtarët në një proces disiplinor të shpejtë dhe u vendosi gjobë prej nga 500 mijë euro secilit.
Valverde pësoi një lëndim në kokë, mori qepje dhe stafi mjekësor i rekomandoi pushim prej 10 deri në 15 ditësh. Megjithatë, ai u kthye më herët në stërvitje, siç konfirmoi gazetari Fabrizio Romano dhe faqja zyrtare e Real Madrid me një fotografi.
Kthimi konsiderohet sinjal pozitiv për stabilizimin e situatës brenda skuadrës. Valverde pritet të jetë i disponueshëm për ndeshjet e fundit në La Liga ndaj Sevillës dhe Athletic Bilbaos.
Raportimet tregojnë se disa lojtarë kanë kërkuar largimin e tij gjatë afatit kalimtar të verës për shkak të qëndrimit të tij gjatë sezonit. Klube si Paris Saint-Germain dhe Manchester United kanë shprehur interes, por Valverde nuk dëshiron të largohet nga Madridi.