Yanis Varoufakis, kreu i MeRA25 dhe ish-ministër grek i financave, në emisionin Debat Plus shprehu vlerësime pozitive për Kosovën.
Ai theksoi se imazhi i Kosovës në Greqi është përmirësuar dramatikisht gjatë dy apo tre viteve të fundit. Sipas tij, ky përmirësim ka ardhur për shkak të pozicionit të Kosovës në përplasjet që ka pasur Greqia me Maqedoninë e Veriut. «Kjo përplasje na ka kthyer prapa për dekada të tëra, i ka kthyer prapa maqedonasit dhe rajonin, kështu që për mua çfarë është e rëndësishme është që të largohemi nga konfliktet e pakuptimta», deklaroi ai.
Varoufakis identifikoi nacionalizmin si një prej arsyeve kryesore pse Greqia deri tani nuk e ka njohur shtetin e Kosovës. Në Greqi ekziston perceptimi se njohja e Kosovës do të «legjitimojë» Qipron Veriore, e cila njihet vetëm nga Turqia. Megjithatë, ai e cilësoi këtë qasje si të gabuar dhe të së kaluarës.
Sa i përket ekonomisë, Varoufakis vlerësoi zhvillimet pozitive të politikave financiare në Kosovë që nga viti 2005. Ai kritikoi vendimin për të pranuar eun si monedhë: «Asnjë ekonomi nuk mund të zhvillohet nëse e përdor valutën e dikujt tjetër». Duke e krahasuar me Islandën, që ka valutën e vet, ai sugjeroi përdorimin e një vlere digjitale dhe paralajmëroi për probleme makroekonomike gjatë integrimit në Bashkimin Evropian, për shkak të kapaciteteve të kufizuara fiskale.
Kush është Yanis Varoufakis?
Yanis Varoufakis është ekonomist grek me ndikim, shkrimtar, bloger dhe profesor universitar. Ai studioi në Universitetin e Essex, ku mori doktoraturën, dhe ka ligjëruar në universitete si Kembrixh, East Anglia, Glasgow, Sydney dhe Universiteti i Athinës.
Ai hyri në politikë me partinë SYRIZA dhe u emërua ministër i financave në 2015. Dha dorëheqjen më 6 korrik 2015. Gjatë karrierës, ka marrë pjesë në debate për krizat ekonomike në Evropë, euro dhe krizën globale financiare të viteve 2008-2012. Ai kundërshtoi masat shtrënguese të Fondit Monetar Ndërkombëtar dhe institucioneve evropiane.