Ministrja në detyrë e Mjedisit, Planifikimit Hapësinor dhe Infrastrukturës, Fitore Pacolli, ka njoftuar se aksioni për lirimin e pronave publike përreth Liqenit të Ujmanit ka rezultuar deri tani me rrënimin e 17 objekteve dhe vilave të ndërtuara pa leje.
Së fundmi, në kuadër të këtij operacioni, u rrënua hoteli “Jezero”, i cili ishte ndërtuar në pronën e ndërmarrjes publike “Ibër-Lepenci”. Ky veprim vjen si vazhdimësi e një plani më të gjerë për largimin e ndërtimeve ilegale, pasi gjatë javës së kaluar u realizua rrënimi i 11 vilave të tjera në të njëjtën zonë.
Procesi i rrënimit po zbatohet nga përfaqësues të ndërmarrjes “Ibër-Lepenci”, të cilët po mbështeten nga Policia e Kosovës për të garantuar mbarëvajtjen e aksionit. Ministrja Pacolli u shpreh se ky angazhim për mbrojtjen e pronës publike dhe zbatimin e ligjit nuk do të ndalet.
Sipas njoftimit zyrtar, aksioni do të vazhdojë pa kompromis dhe synohet shtrirja e tij edhe në pjesë të tjera të Kosovës, për të trajtuar ndërtimet e ngritura në kundërshtim me rregulloret në fuqi.