Vedat Muriqi, sulmuesi kosovar i Mallorcës, ka ndarë emocionet pas golit dramatik ndaj Real Madridit dhe planet për të ardhmen me kombëtarën e Kosovës.
Në një intervistë për La Zona 10, Muriqi rrëfeu se pas realizimit në minutën 91 shpërtheu. "Nisa të vrapoja drejt flamurit të kornerit dhe fillova të ndihesha ndryshe. Lotët nisën të më rrjedhin. Nuk doja që emocionet e mia për Kosovën ta dëmtonin Mallorcan", tha ai.
Sa i përket karrierës ndërkombëtare, Muriqi kishte një plan të qartë. "Plani ishte të luaja në Kupën e Botës dhe pastaj të tërhiqesha. I thashë presidentit dhe trajnerit për vendimin tim", deklaroi ai. Megjithatë, ende nuk ka marrë një vendim përfundimtar.
"Nuk e kam menduar, po përpiqem të mos e bëj sepse dua të përqendrohem në atë që ka mbetur me Mallorcan. Më vonë do të kem kohë të mendoj për këtë. Nuk kam vendosur asgjë. E kam diskutuar me gruan dhe familjen time dhe duhet ta peshoj", shtoi sulmuesi.