Vedat Muriqi, sulmuesi i Mallorca-s dhe i Kombëtares kosovare, u shpall lojtari më i mirë i muajit në La Liga.
Ky vlerësim vjen pas formës së tij të lartë, me pesë gola në katër takime të fundit, përfshirë një hat-trick kundër Athletic Bilbao. Me 14 gola të shënuara deri tani në kampionat, Muriqi renditet i dyti në listën e golashënuesve pas Kylian Mbappé, i cili ka 21 gola.
Në një intervistë për median IB3, Muriqi shprehu kënaqësinë për çmimin dhe u shpreh realist lidhur me garën për Këpucën e Artë. "Është e pamundur të konkurrosh me një lojtar si Kylian Mbappé. Ai i përket një bote tjetër. Për mua do të ishte fitore nëse e mbyll sezonin në pozicionin ku jam tani. Nëse dal i dyti në renditjen e golashënuesve, do të festoj sikur të isha i pari", tha ai.
Muriqi foli edhe për situatën e Mallorca-s, duke theksuar nevojën për unitet. "Nuk kam dyshim se Mallorca do të qëndrojë në La Liga. Tifozët kanë të drejtë të na kritikojnë, por nuk është momenti për t’u dorëzuar. Duhet të qëndrojmë të bashkuar me drejtuesit dhe secili të bëjë pjesën e vet", u shpreh ai.
Ai përmendi gjithashtu nevojën për përforcime në merkato. "Kemi nevojë për futbollistë me përvojë. Jemi vonë në këtë drejtim dhe duhet të kishim sjellë lojtarë më herët", tha sulmuesi prizrenas.