Erion Veliaj, kryebashkiak i Tiranës, dhe vëllai i tij, Arbër Veliaj, kanë zhvilluar një fushatë lobimi në Shtetet e Bashkuara, e cila u ka kushtuar gati 220 mijë dollarë vetëm në vitin 2025.
Nga qelia e paraburgimit, ku ndodhej prej dy muajsh, Veliaj i shkroi më 23 prill 2025 një letër senatorit amerikan Dick Durbin, demokrat nga Ilinois. Në të, ai e përshkroi veten si viktimë të një persekutimi të ngjashëm me atë të regjimit komunist në Shqipëri. “Kjo më kujton taktikat e vjetra komuniste në Shqipëri, kur në mënyrë të paarsyeshme shënjestrohej ‘viktima’ dhe nxitej histeria për ta dehumanizuar, ndërkohë që shënjestra mbahej e izoluar në burg, pa akuza”, shkroi Veliaj. Ai i kërkoi Durbinit të bëhej “një flamurtar” i përballjes së tij me sistemin e drejtësisë shqiptare.
Detajet e fushatës së lobimit
Dokumentet e publikuara pranë njësisë së regjistrimit FARA nga studio ligjore të kontraktuara nga Arbër Veliaj, si Kasowitz LLP dhe Kasowitz Benson Torres në Nju Jork, si dhe Mishcon de Reya në Londër, përmbajnë pretendime për persekutim nga sistemi i drejtësisë. Këto dokumente shoqërohen me artikuj nga media shqiptare në favor të Veliajt dhe përmendin pretendime se ai hetohet nga një prokuror në konflikt interesi, si dhe se në sallën e gjyqit përdoren ofendime ndaj tij.
Akuzat penale
Veliaj u arrestua në shkurt 2025 nga Prokuroria e Posaçme për akuzat e korrupsionit, pastrimit të parave dhe fshehjes së pasurisë. Bashkë me të akuzohen bashkëshortja Ajola Xoxa, ish-deputetja e PS Klotilda Bushka dhe 15 persona të tjerë, mes tyre biznesmenë dhe bashkëpunëtorë. Veliaj dhe bashkëakuzuarit i kundërshtojnë akuzat.