Antonio Oseguera Cervantes, 67 vjeç, është deklaruar fajtor për bashkëpunim në trafikimin e kokainës dhe metamfetaminës drejt Shteteve të Bashkuara. Sipas prokurorëve federalë, ai ka vepruar si një figurë kyçe brenda Kartelit të Gjeneratës së Re të Jalisco-s (CJNG), duke bashkëpunuar ngushtë me vëllain e tij, Nemesio Rubén Oseguera Cervantes, i njohur si “El Mencho”. Ky i fundit u vra nga ushtria meksikane gjatë muajit shkurt, ngjarje e cila shkaktoi trazira të dhunshme në Meksikë.
Sipas dokumenteve gjyqësore, Antonio Oseguera Cervantes dyshohet se ka shpërndarë të paktën 450 kilogramë kokainë dhe 45 kilogramë metamfetaminë gjatë periudhës nga janari i vitit 1998 deri në dhjetor të vitit 2022. Përveç akuzave për trafik droge, ai pranoi fajësinë edhe për posedim të një arme zjarri në funksion të aktiviteteve të kartelit. Përpara angazhimit në CJNG, ai ka qenë pjesë e Kartelit Milenio.
Administrata e presidentit Donald Trump e shpalli CJNG-në si organizatë të huaj terroriste vitin e kaluar. Antonio Oseguera Cervantes u transferua nga Meksika në SHBA për t’u ndjekur penalisht në shkurt të vitit 2025. Ndërkohë, Shtetet e Bashkuara kanë njoftuar kohët e fundit sanksione ndaj mbi 50 individëve dhe subjekteve që dyshohet se kanë lidhje me këtë organizatë kriminale, përfshirë drejtuesin e ri të kartelit, Juan Carlos Gonzalez.