Autoritetet venezueliane kanë liruar një grup të burgosurish të huaj, mes tyre shtetas shqiptarë, irlandezë, çekë, rumunë, gjermanë, ukrainas dhe holandezë, të cilët u akuzuan për një komplot për vrasjen e presidentit Nicolas Maduro dhe rrëzimin e qeverisë. Lajmi u bë i ditur më 16 janar 2026 nga media çeke dhe autoritetet e Pragës.
Shtetasi çek Jan Darmovzal, i arrestuar në shtator 2024, u lirua sot në orët e para të mëngjesit, rreth orës 4:00 sipas kohës së Pragës, së bashku me të tjerët. Ministri i Jashtëm çek Petr Macinka deklaroi se lirimi erdhi pas negociatash intensive, me ndihmë nga Shtetet e Bashkuara. Ai falënderoi ministrin e Mbrojtjes Jaromír Zůna për organizimin e avionit që po i kthen të burgosurit në vendet e tyre.
Diplomacia çeke dhe organizata joqeveritare Foro Penal e kanë konsideruar arrestimin e Darmovzal-it të pabazuar dhe me motive politike. Foro Penal njoftoi se që nga 25 dhjetori deri më 1 janar u liruan 117 të burgosur politikë, ndërsa që nga 8 janari edhe 84 të tjerë, për një total prej 201 personash. Megjithatë, rreth 800 të tjerë vazhdojnë të mbahen në burg për bindje politike.
Përditësime
Ministria e Jashtme e Shqipërisë konfirmoi lirimin dhe sigurinë e shtetasit shqiptar Jozef Ndoci. Ai u arrestua në tetor 2024 në burgun El Rodeo të Mirandës, u transferua në DGCIM dhe tani ndodhet në ICRC Caracas, në pritje të lejes së kthimit.