Pesë ditë pas goditjeve sizmike, operacionet e kërkim-shpëtimit vazhdojnë në kushte të vështira, veçanërisht në shtetin La Guaira, që ka pësuar dëmet më të mëdha. Sipas të dhënave zyrtare të bëra të ditura nga presidenti i parlamentit, Jorge Rodriguez, numri i viktimave ka arritur në 1,719. Përveç të vdekurve, 5,034 persona kanë mbetur të plagosur dhe 15,866 banorë kanë mbetur pa strehë. Ndërkohë, frika mbetet e lartë pasi mbi 50,000 persona rezultojnë ende të zhdukur.
Një pasgoditje me magnitudë 4.6 shkaktoi panik në kryeqytetin Karakas, ndërsa banorët në El Junquito, rreth 33 kilometra në perëndim, kanë raportuar mungesë të ndihmës shtetërore dhe vonesa në operacionet e pastrimit të rrënojave. Në këtë zonë, qendra tregtare është shkatërruar pothuajse plotësisht, duke detyruar shumë banorë të strehohen në tenda për shkak të rrezikut nga godinat e dëmtuara.
Agjencitë humanitare theksojnë se 72 orët e para pas një fatkeqësie janë vendimtare, megjithatë shpresat për të gjetur të mbijetuar mbeten në rastet kur personat e bllokuar kanë pasur qasje në ujë dhe ushqim. Ndërkohë, 24 shtete kanë dërguar ndihma emergjente, ekipe të specializuara dhe qen të trajnuar për kërkim në rrënoja.
Sfida kryesore për qeverinë venezueliane po zhvendoset drejt fazës së rimëkëmbjes. Në kushtet e një krize ekonomike të vazhdueshme, mbeten pikëpyetje mbi kapacitetin e shtetit për të menaxhuar një operacion rindërtimi që pritet të zgjasë për vite të tëra.
Përditësime
• Autoritetet kanë konfirmuar 1719 viktima nga dy tërmetet e fuqishme në Venezuelë, pas verifikimit të shifrave zyrtare.
• Ekipet e shpëtimit vijojnë operacionet intensive, duke arritur të nxjerrin disa të mbijetuar nga rrënojat.
• Presidentja e përkohshme, Delcy Rodríguez, e cilësoi situatën si një krizë të përmasave të paprecedenta.
• Banorët kanë akuzuar qeverinë për neglizhencë, duke denoncuar reagimin e vonuar të institucioneve shtetërore në menaxhimin e emergjencës.
Në vijim të tërmeteve shkatërruese në Venezuelë, që deri tani kanë shkaktuar 1719 viktima, ekipet ndërkombëtare të shpëtimit USAR ECU-01 dhe ato të Republikës Dominikane arritën të nxjerrin të gjallë një 12-vjeçar pas 5 ditësh nën rrënoja në lagjen Macuto, La Guaira. Paralelisht, autoritetet konfirmuan se në momentin e lëkundjeve, në një hotel në La Guaira ndodheshin 146 shtetas venezuelianë të sapodeportuar nga SHBA.
Një javë pas tërmeteve shkatërruese në Venezuelë, autoritetet kanë përditësuar bilancin e viktimave, i cili është rënduar ndjeshëm duke arritur në 2,295 të vdekur. Sipas të dhënave zyrtare, numri i të plagosurve ka shkuar në 11,000, ndërsa 12,841 qytetarë rezultojnë të prekur nga pasojat e katastrofës sizmike.