Vërshimet e fundit në veri të Kosovës kanë shkaktuar dëmtime në infrastrukturë dhe nevojë për evakuime. Më datë 8 janar 2025, në fshatin Beluçe të Leposaviqit, një urë ka pësuar dëmtime si pasojë të ujit të tepërt, ku njëra këmbë e saj është dëmtuar.
Drejtoria Rajonale e Policisë në Mitrovicë Veri ka njoftuar se situata është nën monitorim të vazhdueshëm për sigurinë dhe rendin publik. Policia e Kosovës ka qenë e angazhuar në terren në koordinim me institucionet relevante, si komunat përkatëse, Njësinë e Zjarrfikësve dhe Agjencinë për Menaxhimin e Emergjencave, për të menaxhuar situatën dhe parandaluar rreziqe për qytetarët.
Pas marrjes së informacionit për dëmtimin e urës, Policia ka njoftuar zyrtarët komunalë të Leposaviqit dhe përfaqësuesit e Ministrisë së Infrastrukturës. Këta të fundit kanë inspektuar vendin dhe kanë konstatuar se ura paraqet rrezik për sigurinë, duke vendosur mbylljen e saj përkohësisht deri në vendim të mëtejshëm.
Vërshimet janë evidentuar gjithashtu në qytetin e Zveçanit dhe në Mitrovicë Veri. Gjatë këtyre ditëve, në Mitrovicë Veri janë evakuuar katër familje pasi shtëpitë e tyre janë përmbytur nga uji.
Situata aktualisht është e menaxhueshme, sipas Policisë së Kosovës, e cila vazhdon monitorimin në terren. Qytetarët mund të kontaktojnë numrin 192 për çdo emergjencë. Policia thekson përkushtimin për mbrojtjen e jetës dhe pronës në situata të tilla natyrore.