Pas rreth dy muajsh në arrati, Marjaldo Nela është vetëdorëzuar në komisariatin e policisë. Ai akuzohet për vrasjen e 30-vjeçarit Endri Goxhaj, ngjarje e regjistruar mbrëmjen e 21 prillit në qendër të Memaliajt.
Sipas hetimeve të Prokurorisë, konflikti nisi nga një sherr i çastit mes shtatë personave. Gjatë përplasjes, Endri Goxhaj qëlloi me pistoletë katër herë ndaj Dali Nelës, duke e lënë atë të plagosur. Në reagim, vëllezërit e të plagosurit, Donaldo dhe Marjaldo Nela, qëlluan ndaj Goxhajt, i cili ndërroi jetë në vend. Pamjet filmike të sekuestruara nga grupi hetimor tregojnë se viktima nuk arriti të përdorte armën në momentin kur u qëllua.
Pas ngjarjes, Donaldo dhe Marjaldo Nela transportuan vëllanë e tyre të plagosur në Spitalin e Gjirokastrës dhe më pas u larguan nga vendngjarja. Gjykata e Gjirokastrës ka caktuar masën e sigurisë "arrest shtëpie" për Dali Nelën, Aldo Kalemin dhe Ermal Matajn. Ky i fundit akuzohet për veprën penale "Veprime që pengojnë zbulimin e të vërtetës", pasi dyshohet se ka fshehur armën e përdorur në krim.
Me vetëdorëzimin e Marjaldo Nelës, autoritetet vijojnë kërkimet për të identifikuar vendndodhjen e vëllait të tij, Donaldo Nela, si dhe për të zbardhur plotësisht dinamikën e ngjarjes.
Përditësime
Burimet hetimore kanë konfirmuar lidhjen familjare mes palëve të përfshira në ngjarjen e Memaliajt, ku Aldo Kalemi rezulton vjehrri i Marjaldo Nelës. Autoritetet kanë përjashtuar pistën e përplasjes mes grupeve kriminale, duke sqaruar se incidenti nuk është pasojë e konflikteve të strukturuara.