Procesi i vetingut, pjesë kyçe e reformës në drejtësi, mbylli siparin më 5 mars me vendimet e fundit të Kolegjit të Posaçëm të Apelimit. Gjatë tetë viteve, kaluan nëpër këtë filtrë 805 gjyqtarë, prokurorë dhe ndihmës ligjorë.
Të dhënat e analizuara nga BIRN tregojnë se 442 subjekte rivlerësimi, ose 55% e totalit, u larguan nga detyrat. Nga këta, 268 u shkarkuan, 105 dhanë dorëheqjen dhe 49 të tjerë u larguan pa vendim përfundimtar. Pjesa tjetër, rreth 45%, i mbijetoi procesit.
Më shumë se gjysma e magjistratëve shpenzuan vite të gjata për t'u përballur me shkallën e parë dhe Kolegjin, ndërsa një numër më i kufizuar iu drejtuar Gjykatës Europiane të të Drejtave të Njeriut.
Afrim Krasniqi, drejtues i Institutit për Studime Politike, e cilëson vetingun si "një operacion të jashtëzakonshëm" me bilanc pozitiv për drejtësinë. "Ndoshta në kushtet e Shqipërisë ishte rruga e vetme për të bërë një reformë të tillë, kështu që mendoj se në kornizë institucionale ishte zgjidhja e duhur", tha ai.
Erida Skëndaj, drejtuese e Komitetit Shqiptar të Helsinkit, thekson se vetingu largoi gjyqtarë dhe prokurorë me probleme serioze me kriterin e pasurisë dhe figurës, duke rrëzuar konceptin e paprekshmërisë së tyre.
Romina Zano, avokate që ka mbrojtur magjistratë, e konsideron procesin si ndërhyrjen më të rëndësishme strukturore në drejtësinë shqiptare që prej 1991. Ajo vlerëson se "procesi i shumëpritur ndodhi", por kritikon standardet e ndjekura dhe barrën e rëndë mbi magjistratë, duke lënë një trashëgimi të papërfunduar.