Futbollisti kosovar Veton Tusha ka ndërmarrë një hap të ri në karrierën e tij, duke u transferuar te skuadra sllovene e NK Celje. Lajmi është bërë zyrtar nga klubi slloven, i cili njoftoi arritjen e marrëveshjes me FC Drita për shërbimet e 23-vjeçarit.
Sipas njoftimit zyrtar, vendimi për angazhimin e Tushës erdhi pasi ai la përshtypje të mira gjatë përballjeve mes Celjes dhe Dritës në kualifikimet e Ligës së Konferencës. Drejtuesit e klubit vlerësuan shpejtësinë dhe aftësitë e tij sulmuese, të cilat kishin krijuar vështirësi për mbrojtjen sllovene në ato ndeshje.
Në dy sezonet e fundit me Dritën, Tusha regjistroi 16 gola dhe 6 asistime, duke kontribuar në fitimin e titullit kampion nga skuadra gjilanase për dy sezone radhazi. Rrugëtimi i tij sportiv përfshin eksperienca te Kaçaniku, FK Vardar, Denizlispor në Turqi, Bruk-Bet Termalica në Poloni, si dhe Ballkani dhe Dinamo City.
Te Celje, Veton Tusha do të bashkohet me futbollistin tjetër kosovar, Milot Avdyli.