Shërbimet e policisë shqiptare po kryejnë kërkime intensive në lumin Mat për gjetjen e shtetasit J. K., 30 vjeç, i cili dyshohet se është marrë nga rrjedha e përroit të fshatit Dars. Ngjarja ndodhi prej datës 10 janar 2026, kur 30-vjeçari, që sipas versioneve ishte pasagjer në një automjet që pësoi aksident, ra në rrjedhë dhe përfundoi në lumin Mat.
Operacioni i kërkimit, i cili ka hyrë në ditën e dytë, përfshin palombarët e RENEA-s, Forcat Kombëtare të Sigurisë, Njësia Shkodër (FNSH), Forcën e Posaçme Shqiponja të Drejtorisë Vendore të Policisë Dibër, shërbimet e Komisariatit të Policisë Mat, Shërbimin e Mbrojtjes nga Zjarri dhe Shpëtimi, përfaqësues të Forcave të Armatosura, si dhe forca vullnetare. Këto forca po krehin shtratin e lumit nga të dyja anët, duke përdorur mjete të specializuara për të mbuluar zonën e gjerë.
Deri në këto momente, nuk është bërë e mundur gjetja e trupit të 30-vjeçarit. Policia ka publikuar një video në rrjetet sociale për të njoftuar publikun mbi përpjekjet e vazhdueshme. Kërkimet po kryhen në zonën Klos-Mat dhe pritet të vazhdojnë derisa të arrihet rezultati i dëshiruar.