Lidhja Demokratike e Kosovës (LDK) ka arritur marrëveshje bashkëpunimi me ish-presidenten Vjosa Osmani për zgjedhjet e 7 qershorit. Sipas detajeve të bëra publike, Osmani do të jetë bartëse e listës zgjedhore dhe kandidate për presidente, ndërsa kryetari i partisë, Lumir Abdixhiku, numri 2 në listë dhe kandidat për kryeministër.
Nënkryetari i LDK-së, Kujtim Shala, bëri të ditur se kjo marrëveshje pritet të miratohet të shtunën në mbledhjen e Këshillit të Përgjithshëm të partisë. Ai theksoi se bashkëpunimi do të sjellë rikthimin e disa ish-anëtarëve të larguar dhe përfshirjen e figurave të reja. “Me këtë bashkëpunim, do të kthehet Vjosa Osmani, një numër i kolegëve që janë larguar dhe do të vijnë të tjerë të rinj”, deklaroi Shala në emisionin Pressing në T7.
Anëtarja e kryesisë së LDK-së, Jehona Lushaku-Sadriu, konfirmoi dakordimin në parim. Ajo shpjegoi se qytetarët do të kenë mundësi të votojnë Osmanin si kandidate për presidente menjëherë pas konstituimit të Kuvendit. “LDK do t’ua japë qytetarëve mundësinë që ta votojnë Osmanin për presidente”, tha ajo në Rubikon të Klan Kosovës. Lushaku-Sadriu shtoi se Abdixhiku do të prezantojë programin qeverisës si kandidat për kryeministër.
Bashkëpunimi përshkruhet si dyanshëm dhe jo si koalicion klasik, por si përfshirje direkte e ekipit të Osmanit në listën e LDK-së. Anëtari i kryesisë, Visar Azemi, e cilësoi si bashkëpunim të gjerë politik. Partia pritet të ketë vështirësi për të mbyllur listën me 110 kandidatë për shkak të kërkesave të shumta për t’u bashkuar.
Përditësime
Këshilli i Përgjithshëm i LDK-së vendosi sot që Vjosa Osmani të jetë bartëse e listës dhe kandidate për presidente, ndërsa Lumir Abdixhiku kandidat për kryeministër.
Avdullah Hoti dhe Hykmete Bajrami nuk morën pjesë në mbledhje për shkak të pakënaqësisë me kthimin e Osmanit.
Abdixhiku deklaroi se Hoti dhe Bajrami janë në listë dhe nuk mund të jenë kundër, duke theksuar unitetin dhe vullnetin e anëtarësisë.