Skuadra e Vllaznisë ka siguruar titullin kampion për edicionin 2025-2026 në kampionatin shqiptar të futbollit për vajza. Në finalen e zhvilluar në stadiumin "Selman Stërmasi", skuadra kuqeblu mposhti Apoloninë me rezultatin 2-0.
Golat për skuadrën fituese u shënuan nga kapitenia Megi Doçi në pjesën e parë dhe Teresa Deda në minutën e 81-të, duke vulosur trofeun e 13-të radhazi për shkodranet. Pas ndeshjes, ceremonia e dorëzimit të medaljeve dhe kupës u drejtua nga zëvendëspresidenti i FSHF-së, Lutfi Nuri, dhe anëtarja e Komitetit Ekzekutiv, Anila Basha.
Ky sukses i ka garantuar Shqipërisë përfaqësim me dy skuadra në UEFA Women’s Champions League, bazuar në rritjen e koeficientit të vendit në UEFA:
- Vllaznia do të marrë pjesë në "Champions Path".
- Apolonia do të garojë në "League Path".
Të dyja ekipet do ta nisin pjesëmarrjen e tyre në kompeticionin europian nga raundi i dytë kualifikues.