Deputetja e Partisë Demokratike të Kosovës (PDK), Vlora Çitaku, ka shprehur kundërshtimin e saj ndaj deklarimeve për "asimetri dënimesh" lidhur me aktgjykimet ndaj ish-krerëve të Ushtrisë Çlirimtare të Kosovës (UÇK) në Hagë. Reagimi i saj vjen si përgjigje ndaj qëndrimit të kryetarit të Lëvizjes Vetëvendosje (LVV), Albin Kurti.
Përmes një postimi, Çitaku vlerësoi se diskutimi mbi kohëzgjatjen e dënimeve është i gabuar, pasi zhvendos vëmendjen nga thelbi i procesit gjyqësor. Ajo paralajmëroi se narracioni për "asimetri dënimesh" krijon një perceptim të shtrembëruar, sikur çështja e vetme është masa e dënimit, ndërkohë që, sipas saj, po tentohet të bëhet një pranim i pjesshëm i fajësisë.
"Amani ju koftë, mos flisni për ‘asimetri dënimesh’, siç paska folur Kryetari i LVV-së. Sepse kjo i bie me thënë: dënojini, por jo bash kaq shumë, sepse këta katër burra nuk kanë bërë masakra e dhunë sistematike", ka deklaruar Çitaku.
Sipas saj, çështja kryesore në këtë gjykim është përpjekja për të kriminalizuar vetë idenë e luftës çlirimtare, duke e trajtuar UÇK-në si një ndërmarrje të përbashkët kriminale. Në përfundim të reagimit, deputetja e PDK-së përsëriti se problemi qëndron te natyra e asaj që po gjykohet dhe jo te numri i viteve të dënimit. "Problemi nuk është masa e dënimit. Problemi është çfarë po dënohet", ka përfunduar ajo.